Ришат Төхвәтуллин Ильмираның җыры турында: «Руслан рөхсәт итмәде, Марат риза булды»

Ришат Төхвәтуллин Казандагы концертында Ильмира Нәгыймованың җырын башкарды.

«Бу җырны Ильмира әллә кайчан бүләк иткән иде, яңа гына җырлыйм менә. Башта Руслан рөхсәт итмәде, хәзер Марат Яруллин җырларга ризалык бирде», – дип шаяртты ул татар эстрасында әле тыелып торып, кабат яңадан кабынган «Руслан – Ильмира – Марат» мәхәббәт өчпочмагы турында.

Әниләр көнендә Башкортстанның һәм Татарстанның атказанган артисты Ришат Төхвәтуллин Казанда «УНИКС» концертлар залында 2 концерт бирде.

Көндезге сәгать 13.00 башланган концерт 15.20 сәгатьтә бетте (20 минут тәнәфес), әмма халык җырчыны сәхнәдән җибәрмәде. Халык «Агымсу», Мәхәббәтем», «Сарман» җырларын сорап җырлатты, хәтта кунак буларак 2 генә җыр җырлаган хатыны Алия Карачурина-Төхвәтуллина да, кабат чыгып, «Авыл киче»н башкарды.

Концерт кичке сәгать 4 тулганда тәмамланды, халык «УНИКС»тан чыкканда, кичке концертка билет алучылар җыела башлаган иде.