Ринат Рәхмәтуллин махсус хәрби операциядәге егетләрнең әнисен юбилее белән котлаган

Ринат Рәхмәтуллин Балык Бистәсе районы Күгәрчен авылына хәрбиләрнең әнисен туган көне белән котларга барган.

«Махсус хәрби операциядә катнашучы Инсаф белән Булат, әниләрен юбилейлары белән котлап, матур теләкләр теләвебезне сорады. Шундый гаиләләрнең, шундый кешеләрнең күңелен күтәрү – безнең өчен зур шатлык.

Барыбыз бердәм булганда гына тормыш авырлыкларын җиңеп чыгарга мөмкин. Менә шундый чаклар тормышның ни дәрәҗәдә кадерле икәнен исәртеп тора», – дип язган җырчы социаль челтәрдәге сәхифәсендә.

Җырчы хәрбиләрнең әнисенә розалар бүләк итә, котлау сүзләрен җиткерә, матур теләкләрен әйтә, аннары өйдә әниләргә багышланган җыр да башкара.

Диванда утырган юбиляр, егетләрнең туганнары һәм балалар да күз яшьләрен тыеп кала алмый.