КультурэмкIэ мэхьанэшхо зиIэ псэуалъ
Лъэпкъ проектхэмрэ къэралыгъо программэхэмрэ атегъэпсыхьагъэу агъэцэкIэжьырэ псэуалъэхэр къызеплъыхьэхэ нэужым Адыгеим и ЛIышъхьэу КъумпIыл Мурат Концерт залэу «Налмэс» зыфиIоу Мыекъуапэ дэтым игъэкIэжьын зэрэкIорэм зыщигъэгъозагъ.
Республикэм и ЛIышъхьэ игъусагъэх АР-м иминистрэхэм я Кабинет и Тхьаматэ игуадзэу, АР-м финансхэмкIэ иминистрэу Виктор Орловыр, АР-м культурэмкIэ иминистрэу Аулъэ Юрэ, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу, псэолъэшI компаниеу «Марк-сервисым» ипащэу Цуекъо Мурат.
2023-рэ илъэсым гъэтхапэм псэолъэ¬шIын IофшIэнхэр мыщ щырагъэжьагъэх. ЗэрэрахъухьагъэмкIэ, 2024-рэ илъэсым тыгъэгъазэм ехъулIэу псэуалъэр атынэу щыт. Подрядчикым зэригъэгугъагъэхэмкIэ, IофшIэнхэр зэкIэ зэрэрахъухьагъэм тетэу, ауж къимынэхэу агъэцакIэх. Лъэпкъ проектэу «Культурэм» ипхырыщын ишIуагъэкIэ проектым пэIухьащт ахъщэр къыхагъэкIы. ГъэцэкIэжьын Iоф¬хэм зэкIэмкIи сомэ миллион 725-м ехъу апэIухьащт. НепэкIэ агъэфедагъэр сомэ миллион 341,6-рэ.
Шъугу къэтэгъэкIыжьы: Концерт залым иунэу 2005-рэ илъэсым къэралыгъо ансамблэу «Налмэсым» къыратыгъа¬гъэр 1958-рэ илъэсыр ары зашIыгъагъэр. Апэдэдэ Мыекъопэ мебелышI фабрикэу «Зэкъошныгъэм» культурэмкIэ и Унэу ар щытыгъ. А унэм хэтыгъэх цIыфхэр зычIэсыщтхэ залыр, кIэлэцIыкIухэм афытегъэпсыхьэгъэ унэр, тхылъеджапIэр, спортзалыр, гъэмэфэ кинотеатрэр. Я 90-рэ илъэсхэм мыщ чIэтыгъ Камернэ музыкальнэ театрэу А. Хьанэхъум ыцIэкIэ щытыр.
НепэкIэ инженер псэуалъэхэр зэкIэ мыщ щызэблахъугъэх, унэкIоцI ыкIи унэкIыб IофшIэнхэр агъэцэкIагъэх, ложе хъоо-пщаур зэтырагъэпсыхьагъ, сценэм зырагъэушъомбгъугъ, Iэмэ-псымэу сценэм щагъэфедэхэрэр агъэкIэжьыгъэх. Респуб¬ликэм ипащэ зал шъхьаIэм, ¬фойем, ансамблэм, камернэ театрэм ыкIи творческэ коллективхэм ярепетициехэр зыщыкIощтхэ унэхэр къыплъыхьагъэх.
Адыгеим и ЛIышъхьэ къыхигъэщыгъ республикэм ищыIэныгъэкIэ культурэм ипсэуалъэ мэхьанэшхо зэриIэр ыкIи творческэ коллективхэм зыкъыщагъэлъэгъонымкIэ, Iофтхьэбзэ зэфэ¬шъхьафхэр щызэхащэнхэмкIэ джырэ уахътэм дэгъоу диштэрэ чIыпIэу а залышхор хъун зэрэфаер.
«ТапэкIэ псэугъэхэу культурэм иучреждение шIагъо къытфэзгъэнагъэхэм лъытэныгъэ ин афэтэшIы. Мыекъопэ мебелышI комбинатэу «Зэкъошныгъэм» ипащэщтыгъэу Николай Остапенкэм къэлэдэсхэм апае бэдэд зэшIуихыгъэр, къулыкъу мэхьанэ зиIэ социальнэ псэолъабэ ащ аригъэшIыгъ. Ахэм зыкIэ ащыщ культурэм и Унэу Концерт залэу «Налмэсыр». Учреждениер тэрэзэу зэтегъэпсыхьэгъэным, джырэ уахътэм диштэу щытыным мэхьанэшхо иI, Адыгеим, Урысыем и Къыблэ ыкIи хэгъэгум якультурнэ щыIакIэ пытэу ар хэуцон фае», — къыIуагъ КъумпIыл Мурат.
ПсэолъэшIынхэр зыщыкIохэрэ чIыпIэм зыщэIэм Адыгеим и ЛIышъхьэ Концерт залым ичIэхьэпIэ лъэныкъо изэтегъэ¬псыхьан, къыпэIулъ чIыпIэм къэгъагъэхэр щыгъэтIысхьэгъэнхэм, къыпэблэгъэ унэхэми ятеплъэ зыфэдэщтым япхыгъэ пшъэрылъ заулэ афишIыгъ.