Միկրոավտոբուսը շրջվել է ձորը Ալավերդի-Վանաձոր ավտոճանապարհին

ԵՐԵՎԱՆ, 4 դեկտեմբերի. /ԱՌԿԱ/. Ալավերդի-Վանաձոր ավտոճանապարհին ուրբաթ ճանապարհատրանսպորտային պատահար է գրանցվել։

Ինչպես հաղորդում է ՀՀ ՏԿԱԻ նախարարության Փրկարար ծառայությունը, դեկտեմբերի 4-ին ժամը 11։50-ին ահազանգ է ստացվել, որ  Ալավերդի-Վանաձոր ավտոճանապարհին` «Ջաղացներ» կոչվող վայրի մոտակայքում, տեղի է ունեցել ՃՏՊ, «Մերսեդես Վիտո» մակնիշի ավտոմեքենան դուրս է եկել ճանապարհի երթևեկելի հատվածից և ընկել ձորը, կան տուժածներ։

«Դեպքի վայր է մեկնել մեկ մարտական հաշվարկ», – նշվում է հաղորդագրության մեջ։

Պարզվել է, որ Մ-6 ավտոճանապարհի Ալավերդի-Վանաձոր 20-րդ կմ-ին «Մերսեդես Վիտո» մակնիշի ավտոմեքենան (վարորդ՝ 1961 թ. ծնված Ռ. Գ., Վրաստանի Հանրապետության քաղաքացի) դուրս է եկել ճանապարհի երթևեկելի հատվածից և գլորվել մոտ 8 մ խորությամբ ձորը:

Մինչ հրշեջ-փրկարարների դեպքի վայր հասնելը 7 ուղևորները տեղի ուժերով դուրս են բերվել ավտոմեքենայից։

«Երեք տուժածներից մեկը՝ 1989 թ. ծնված Մ. Դ.-ն (Ռումինիայի Հանրապետության քաղաքացի), շտապօգնության աշխատակիցների կողմից ստացել է առաջին բուժօգնություն, իսկ մյուս 2 տուժածները` 1972 թ. ծնված Բ. Բ.-ը  և 1956 թ. ծնված Կ. Շ.-ն, հոսպիտալացվել են Վանաձորի բժշկական կենտրոն, որտեղ տուժածների առողջական վիճակը բժիշկները գնահատել են միջին ծանրության», – նշվում է Փրկարար ծառայության հաղորդագրության մեջ։–0–