«Җәзаңны бу дөньяда биреп куй» – үзебезгә авырлык теләп дога кылырга ярыймы?
Тимергали хәзрәт Юлдашев телеграм-каналында үзебезгә авырлык теләп дога кылырга ярыймы икәнен аңлата.
«Әнәс радыяллаһу ганһедән болай дип риваять кылына: «Расүлуллаһ салләллаһу галәйһи вә сәлләм бик хәлсезләнгән бер авыру кешенең хәлен белергә барды һәм аннан:
– Аллаһка берәр нәрсә өчен дога кыла идеңме яки Аннан берәр нәрсә сорый идеңме? – дип сорады.
Авыру кеше:
– Әйе, Аллаһым, миңа Ахирәттә бирәчәк җәзаңны бу дөньяда алдан биреп куй, дип дога кыла идем, – дип җавап бирде.
Расүлебез салләллаһу галәйһи вә сәлләм:
– Сөбханәллаһ! Синең моңа көчең җитмәс. Менә болай дога кылсаң, ярамас идеме: «Аллаһым! Безгә дөньялыкта да игелек бир, Ахирәттә дә игелек бир һәм безне җәһәннәм газабыннан сакла!» – диде.
Шуннан соң авыру бәндә шул доганы укый һәм шифа таба» (имамнар Мөслим, Әт-Тирмизи хәдисләр җыентыгында килә).
Бу дога без һәрдаим кыла, намазларыбызда да укый торган «Раббәнә» догасы, кардәшләрем! Ул Коръәни Кәримнең Әл-Бәкара / Сыер сүрәсенең, 2:201 аятендә килә.
Бу дога болай яңгырый: رَبَّنَا آتِنَا فِى الدُّنْيَا حَسَنَةً وَفِى الْآخِرَةِ حَسَنَةً وَقِنَا عَذَابَ النَّارِ الرَّاحِمِينَ
Укылышы: Раббәнәә әәтинәә фид-дүнйәә хәсәнәтән вә фил-әәхырати хәсәнәтән вә кыйнәә газәәбән-нәәр («з» хәрефе сакау итеп укыла).
Мәгънәсе: «Аллаһым! Безгә дөньяда һәм Ахирәттә яхшылык бир һәм безне җәһәннәм газабыннан сакла».
Һәркемгә дә бәрәкәтле, имин, догалы көннәр теләп калам!» дип яза хәзрәт.