Бер районда этләрне агулап йөриләр, дигән хәбәр таралды

Питрәч районының Шигали бистәсендә билгесез кешеләр этләрне агулап йөри. Билгесез затларның машинада килеп туктап, җиргә нәрсәдер салып киткәннәрен күргәннәр. Шуны ашаган 6 этнең инде 4се интегеп үлгән, дип яза «Татарстан тормышы» телеграм-каналы. Таралган видеода бер эт, чиный-чиный, калтырый-калтырый, газапланып, карда ята.

Былтыр октябрь аенда да Иске Шигали авылында моңа охшаш хәл булган. Ул вакытта бер ир-ат бер ярым-ике айлык көчекләрне үтергән. Бу бәндәнең кем булуын ачыклаганнар, ул үз гамәлләрен тирә-юньдәгеләрнең тормышын саклау теләге белән аңлаткан.

Казан Башкарма комитеты җитәкчесе урынбасары һәм «Хайваннар дөньясын саклау» партия проектының Татарстан координаторы Искәндәр Гыйниятуллин ул вакытта «ВКонтакте» сәхифәсендә бу хәл турында язган иде. Көчекләрне күрше йортта яшәүче бер хатын-кыз ашатып торган, барлыгы 12 эт баласы булган.

22 октябрь төнендә хатын-кыз этләрнең берсен асып куелган хәлдә күрә, өчесе генә исән калган була. Тагын берсе күрше йортта табыла.

«Кешеләр, сез хайван гына түгел, сез әшәкерәк – сез җанварлар! Яклаусыз җан иясе белән ничек шулай эшләп була?! Шулай вәхшиләрчә асып куяргамы?!!! Ни өчен Питрәчтә мондый хәл булган? Чөнки быел да шушы ук авылда этләрне күпләп үтерделәр – анда кем яши сезнең, нинди кабәхәтләр?!» – дип язган Искәндәр Гыйниятуллин ул вакытта.

Аның сүзләренчә, октябрь аена кадәр дә, апрель аенда Питрәч районында үлгән этләр табылган. Ул вакытта Гыйниятуллин социаль челтәрдәгеләрдән бу турыда ни дә булса белүчеләрне эзләде. Прокуратурадан җинаять эше ачуларын сорады.

«Барлык билгеле маньяк-киллерлар яклаусыз җан ияләрен – мәчеләрне, этләрне, бакаларны мыскыл итүдән башлаганнар. Аннары алар кешеләр янына киткәннәр. Сезнең арада йөрүчеләрдән сак булырга кирәк», – дип фикерен белдергән түрә.

Бүгенге очрак – агулау очрагы турында Питрәч районы прокуратурасы полициягә мөрәҗәгатьләрне теркәргә, тикшерүне оештырырга йөкләмә биргән.