Күп балалы хатынны ире үтергән һәм мәетен урлаган

Мурманск өлкәсендә күп балалы хатынны элеккеге ире үтереп, мәетен урлап алып киткән. Бу турыда Россия Эчке эшләр министрлыгының рәсми вәкиле Ирина Волкка сылтама белән РЕН ТВ хәбәр итте.

Җинаять 26 мартта була. Кировск шәһәренең Олмипийская урамында хатын-кыз кычкырган һәм аткан кебек тавышлар ишетелү турында полициягә хәбәр итәләр.

Урынга хокук саклаучылар килә. Кар өстендә кан таплары табыла. Тикшерү барышында ачыкланганча, билгесез ир-ат узып баручы хатынга берничә тапкыр ата. Аннары ул хатынны машинасына салып алып китә.

Берничә сәгатьтән соң җинаятьченекенә охшаган машинаны Апатиты шәһәрендә полиция хезмәткәрләре күрә. Автомобильчене тоткарлыйлар, полициягә алып киләләр.

Шуннан соң ачыкланганча, тоткарланган ир-ат – мәрхүмә хатынның элеккеге ире булып чыга. Хатынның 4 баласы ятим калган. Тикшерү барышында хокук саклаучылар машина түбәсендә үтерү коралын таба. Ул мылтыкка охшаган әйбер була. Коралны экспертизага җибәргәннәр.

Мәрхүмә хатын мәетен Кировск шәһәрендәге сәнәгать мәйданчыкларының берсендә икенче көнне тапканнар. Аның гәүдәсендә атып яраланган эзләр күп булуы ачыкланган.

Үтерү һәм урлау матдәләре буенча җинаять эше ачылган.