Çĕпĕр язвинчен вакцина тăваççĕ

Çĕрпӳ тăрăхĕнчи Кивĕ Тутайкассинче пуснă Çĕпĕр язвипе чирленĕ вăкăр какайне тупнă. Раççей Федерацийĕн Следстви комитечĕн Чăваш Енри следстви управленийĕнчен пĕлтернĕ тăрăх, чирленĕ выльăх какайĕ республикăри ялсенчен пулнă. Кил хуçи ăна икĕ расна хĕрарăма сутнă пулнă. Роспотребнадзор ĕçченĕсем аш какая унтан илсе кайнă, кирлĕ анализсем илеççĕ. Чăваш Республикинче мăйракаллă шултра выльăхсене Çĕпĕр язвинчен вакцина тăваççĕ. Ку çулсерен пыракан пулăм. Пирĕн пултарулăх ушкăнĕ те ветеринарсемпе пĕрле çула тухрĕ. Шупашкар тăрăхĕнчи Варпуç ялĕнче ĕç кĕрлесе тăрать. Пурин те килте пулмалла. Ветеринарсем выльăхсене Çĕпĕр язвинчен сыхлăх шĕвекĕ яраççĕ. Камăн ĕне, пушмак пур ку вакцинăна ырласа йышăнаççĕ. Хăрушă чиртен сыхланма пулăшать-çке. Дмитрий Иванов Шпунтика, Малинăна, Тонькăна тутлă апат çитернĕ май ачашшăн лăплантарать, выльăх тухтăрĕсем килессе систерет. Малашлăха вăл пысăк ĕмĕтпе пăхать. ДМИТРИЙ ИВАНОВ: "Хозяйствăра ĕçлетпĕр, тапаçланатпăр. Ĕнесем, вăкăрсем çитĕнтеретпĕр. Халь 5 ĕне ĕнтĕ, 10 таран çитересшĕн. Тăрăшсан пулать ĕнтĕ. Тăвансем те пулăшма килеççĕ". Мăйракаллă шултра выльăха кĕтĕве тухиччен вакцина тутармалла. Пĕтĕ ĕнесене, пĕр уйăхран пăрламаллисене çеç сыхлăх шĕвекне ямаççĕ. Лашасене, качакасене, сурăх, такасене те укол тăваççĕ. Унсăрăн хăрушă амак йĕрме пултарать. Вĕсем чирлесенех апатланма пăрахаççĕ, мăйĕ, пуçĕ шыçать, кĕлетке температури хăпарать. СЕРГЕЙ НАЗАРОВ: "Мăйракаллă шултра выльăхсене 3 уйăхран пуçласа вакцинаци тума пуçлатпăр. 2-мĕш хут тепĕр 6 уйăхран ревакцинаци тăватпăр. Кашни çулта 1 вакцина. Вăрман-Сюктерское сельское поселенире 300 пуç маточный стадо ĕнесем пулнă". Çĕпĕр язвин вакцинине тӳлевсĕр тăваççĕ, федераци хыснинчен укçа уйăрнă. НИКОЛАЙ ЯНЫШКОВ: "Вакцина выльăха чирлеттермест. Этеме, выльăха та вакцина тăваççĕ. Выльăхсăр ниçта та мала каяймастпăр. Эпĕ вакцинăшăн, прививать тунăшăн". Республикăра пурăнакансене те Çĕпĕр язвинчен вакцина тăваççĕ. Сыхлăх хатĕрне Раççейре кăлараççĕ. МИХАИЛ АЛЕКСАНДРОВ: "Вакцина пирĕн пата киличчен поставщик пирĕн пата уведомлени ярать. Эпир вакцина килнĕ çĕре хатĕрленетпĕр. Вырăн тăватпăр, маркировать тăватпăр. Холодильный комнатăна +2, +8 аяла антаратпăр". Чăваш Республикин сывлăх сыхлавĕн министерстви ăна сыватмăшсем тăрăх салатать.