Дельфи вăййисенче ятарлă диплом илнĕ

И. Ульянов ячĕллĕ Чăваш патшалăх университетĕнче вĕренекен, унччен маларах Ф.Павлов ячĕллĕ Шупашкарти музыка училищинче ăс пухнă Данила Польков кăçал Красноярскра çамрăксен хушшинче иртнĕ 21-мĕш Дельфи вăййисене хутшăнса «Классика гитари» номинацире пултарулăхри пуçарушăн ятарлă диплом илме тивĕçнĕ.

Раççейре иртекен Дельфи вăййисене Олимпиада ăмăртăвĕпе танлаштарма пулать. Унта чи пултаруллă ăстасем хутшăнаççĕ. Спортсменсем тĕрлĕ спорт тĕсĕнче мала тухма ăнтăлаççĕ пулсан юрă-кĕвĕ тĕнчипе туслă музыкçăсем пултарулăхпа куракансене, тӳресене тĕлĕнтерме тĕллев лартнă. Кăçал Красноярскра иртнĕ ăмăртăва çĕршыври 79 регионтан 2700 ытла çын хутшăннă. Солистсем, ташăçăсем, фотографсем, дизайнерсем, кулинарсем, модельерсем – кам кăна пулман унта. Вĕсен йышĕнче Чăваш Енри Данила Польков та. Вăл шкулта вĕреннĕ чухне аккордеонпа туслашнă. Тĕрлĕ конкурссенче хутшăннă. Пĕлĕшĕсене асамлă кĕвĕ илемĕпе савăнтарнă. Унтан алла гитара тытсан унран нимĕнле те уйрăлайман. Екатерина Васильева, пултаруллă студента тăрăшулăхшăн, пĕр май çĕнĕлĕх патне туртăннăшăн питĕ хисеплет. Çамрăк виçĕ çулта çĕнĕ инструмента алла илме пултарнă-çке. Данила хăйĕн пĕлĕвне ыттисемпе пайлама та ӳркенмест, хаваспах ăсталăх класĕсем ирттерет. Пуласлăхра вăл музыкçă пулма ĕмĕтленет. Дельфи вăййисенче мала тухни уншăн пуçламăш утăм çеç.