Փաշինյան. «Ադրբեջանը խաղաղության պայմանագրով տարածքային պահանջներ է ներկայացնում»
«Մենք փաստաթղթում որոշակի առաջընթաց տեսնում ենք, սակայն որքան առաջ ենք գնում, այնքան առաջ են գալիս ֆունդամենտալ խնդիրներ:
Ադրբեջանը փորձում է խաղաղության հաստատման պայմանագրի միջոցով ՀՀ-ին տարածքային պահանջներ ներկայացնել, ինչը մեզ համար կարմիր գիծ է:
Մենք տեսնում ենք, որ այդ տեքստի առաջարկներում Ադրբեջանը փորձում է Լեռնային Ղարաբաղում ցեղասպանություն, էթնիկ զտում իրականացնելու մանդատ ձեռք բերել Հայաստանի ստորագրությամբ, դա եւս, բնականաբար, կարմիր գիծ է մեզ համար»,- լրագրողների հետ հանդիպմանն ասել է նա:
Նիկոլ Փաշինյանի խոսքով՝ Ադրբեջանը հետապնդում է նաեւ նպատակ, որպեսզի ստորագրված պայմանագրի կատարման երաշխիքների համակարգ չլինի:
«Մենք ունենք, օրինակ, նոյեմբերի 9-ի փաստաթուղթ, որը չի կատարվում: Հետեւաբար սա ավելի է ընդգծում Հայաստանի զգայունությունը․ որեւէ փաստաթուղթ, որը կստորագրվի, պետք է ունենա իրականացման երաշխիքներ, ցանկալի է՝ միջազգային»,- ասել է Նիկոլ Փաշինյանը: