Улталанас мар тесен

Куçман пурлăха илсен те улталанма пулать. Чее çынсем çĕр е çурт-йĕр туяннă чухне саккуна хирĕçле килĕшӳ тума пултараççĕ. Ултавçăсен серепине лекес мар тесен куçман пурлăхăн пĕрлĕхлĕ патшалăх реестрĕнче ятарлă паллă лартма пулать. Вăл кирек мĕнле килĕшĕве те пурлăхăн хуçи пур чухне çеç тума май килнине кăтартать. Çакна халĕ патшалăх пулăшăвĕн пĕрлехи порталĕнче те хатĕрлеме пулать. Кунпа тĕплĕнрех «Гарант» компани паллаштарать. АНАСТАСИЯ ЕГОРОВА: «Малтан ку енпе МФЦ-на кайса заявлени çырма е Росреестрта ятарлă форма тултарма май килнĕ пулсан, халĕ патшалăх пулăшăвĕн порталĕ урлă заявлени парас тесен вăйлатнă квалификациллĕ электронлă подписьпе "Госключ" приложенире çирĕплетнĕ учётная запись кирлĕ. Ăна тÿлевсĕрех приложенире тума пулать». Куçман пурлăхăн пĕрлĕхлĕ патшалăх реестрĕнче пилĕк ĕç кунĕнчен паллă лартни курăнма пуçлать. Уйрăм кабинета вара кун пирки аса илтерни çитет. Енчен те çакна маларах лартнă пулсан, çак йĕркепех патшалăх пулăшăвĕн пĕрлехи порталĕнче ку чарăва пăрахăçлама пулать.