Песков өлешчә мобилизация төгәлләнү турында документ булмауны аңлатты

Россия Президентының матбугат сәркатибе Дмитрий Песков өлешчә мобилизация тәмамлану турында документ булмауга аңлатма бирде. Хәрби хезмәткә чакырудан тыш, әлеге документ Оборона министрлыгы өчен кирәкле башка бурычларны да үз эченә ала, һәм бу бурычлар тормышка ашырыла, диде ул. Бу хакта «Комсомольская правда» газетасы яза.

Песков сүзләренчә, өлешчә мобилизация кысаларында чакыру «Кораллы Көчләр алдына куелган бурычларны башкару өчен кирәкле кеше санына ирешү» максатында уздырылды.

Песков әйтүенчә, Оборона министрлыгы үзенә кирәк кадәрле кешене мобилизацияләүгә ирешә алган.

«Оборона министрлыгы билгеләнгән санга ирешү, шул сәбәпле өлешчә мобилизация буенча гражданнары чакыру туктатылу, төгәлләнү турында рапорт бирде», – диде Песков.

Матбугат секретаре әйтүеннән чыгып, өлешчә мобилизация кешеләрне мобилизацияләүне генә түгел, башка гамәлләрне дә күз алдында тота, шул сәбәпле, президент карары гамәлдән чыкмый, дип аңларга кирәк.

Дмитрий Песков әйткәнчә, хәрби хезмәткә чакырудан тыш, өлешчә мобилизация турындагы документка «Кораллы Көчләр бурычларын үтәүне тәэмин итү өчен» кирәк булган башка чаралар да керә. «Бу уңайдан ул гамәлдә булуын дәвам итә», – диде ул.