«Տաշիր»-ը մանկապարտեզներ կկառուցի Իջեւանում, Սպիտակում եւ Ալավերդիում
«Տաշիր» բարեգործական հիմնադրամը՝ Կարեն եւ Սամվել Կարապետյանների գլխավորությամբ, երեք նոր մանկապարտեզ կկառուցի Իջեւան, Սպիտակ եւ Ալավերդի քաղաքներում:
Հիմնադրամի տարածած հաղորդագրության համաձայն՝ համապատասխան համայնքների ղեկավարների հետ ընտրվել են նոր կառուցվելիք նախակրթարանների համար հողատարածքները: Սպիտակ քաղաքում սկսվել են հողային աշխատանքները: Առաջիկա օրերին հողային աշխատանքները կսկսվեն նաեւ Ալավերդիում եւ Իջեւանում:
Ավարտական փուլում են Տաշիր եւ Ստեփանավան քաղաքների նախակրթարանների կառուցման աշխատանքները: Շուտով այդ մանկապարտեզները շահագործման կհանձնվեն, որտեղ կսովորեն շուրջ երեք հարյուր երեխաներ:
«Կարապետյանների համոզմամբ՝ կրթության, այդ թվում՝ նախակրթարանների ոլորտում կատարվող ցանկացած ներդրում միտված է ապագային: Այդ ուղղությամբ այսօր կատարված աշխատանքների պտուղները բոլորս քաղելու ենք վաղը: Ուստի պատահական չէ, որ այս ծրագիրը եւս շարունակական է լինելու, եւ առաջիկայում նոր մանկապարտեզներ են կառուցվելու նաեւ հանրապետության այլ համայնքներում»,- ասված է հաղորդագրությունում: