«ՍՊՍ Սիգարոն»-ը մտադիր է ընդլայնել արտադրության ծավալները

Վարչապետ Հովիկ Աբրահամյանն այսօր այցելել է «ՍՊՍ Սիգարոն» ընկերություն:

Կառավարության տարածած հաղորդագրության համաձայն՝ վարչապետը շրջել է ձեռնարկությունում, ծանոթացել արտադրական գործընթացին, ներդրումային ծրագրերին, եղել արտադրամասին կից լաբորատորիայում:

Հովիկ Աբրահամյանին տեղեկացրել են, որ 2013թ. վերաբացված ընկերությունը նախատեսում է ընդլայնել արտադրության եւ արտահանման ծավալները, նոր տեխնոլոգիաների կիրառմամբ էլ ավելի բարձրացնել արտադրանքի որակը:

«ՍՊՍ Սիգարոն» ընկերությունն ապահովում է մոտ 250 աշխատատեղ: Արտադրանքի շուրջ 80%-ն արտահանվում է ԱՄՆ, ԱՊՀ եւ եվրոպական երկրներ:

Վարչապետն ընկերությունում մասնակցել է նաեւ օղու արտադրությամբ զբաղվող «ԱՐՍՍԻ Ալյանս» նոր ձեռնարկության բացմանը:

Ձեռնարկությունում ներդրվել է $1 մլն, որի արդյունքում ստեղծվել են աշխատատեղեր: Ընդհանուր ներդրումերի արդյունքում, մեկ տարվա ընթացքում, աշխատատեղերի թիվը նախատեսվում է հասցնել 70-ի: Տարեկան կտրվածքով նախատեսվում է արտադրել 3-5 մլն շիշ օղի, որի մեծ մասն արտահանվելու է ԱՄՆ, եվրոպական եւ ասիական մի շարք երկրներ: