2016 թ.–ի բյուջեի ցուցանիշները վկայում են Հայաստանի տնտեսության խորքային խնդիրների մասին. փորձագետ

2016 թ.–ի բյուջեի ցուցանիշները վկայում են Հայաստանի տնտեսության մեջ առկա խորքային խնդիրների մասին, շաբաթ օրը լրագրողներին ասաց Հայաստանի գործատուների հանրապետական միության նախագահ Գագիկ Մակարյանը։

ԵՐԵՎԱՆ, 10 հոկտեմբերի./ԱՌԿԱ/. 2016 թ.–ի բյուջեի ցուցանիշները վկայում են Հայաստանի տնտեսության մեջ առկա խորքային խնդիրների մասին, շաբաթ օրը լրագրողներին ասաց Հայաստանի գործատուների հանրապետական միության նախագահ Գագիկ Մակարյանը։

Մակարյանի խոսքով` յուրաքանչյուր տարվա բյուջեն նախորդի տրամաբանական շարունակությունն է, և եթե խոսքը ռազմավարական զարգացման մասին է, ապա բյուջեն պետք է համապատասխանի ընթացիկ գործընթացներին։

 «Այն, որ Հայաստանը սոցիալական պետություն է, լավ երևում է 2016 թ.–ի բյուջեից։ Ծախսային մասի մոտ 2,5 մլրդ դոլարից 800 մլն դոլարն ուղղված է սոցիալական ծրագրերին։ Սա վկայում է այն մասին, որ սահմանափակ հնարավորությունների դեպքում հսկայական գումարներ ուղղվում են սոցիալական կարիքներին։ Միաժամանակ կրթության վրա ծախսվում է մոտ 250 մլն դոլար, բժշկության վրա`160 մլն դոլար», – նշեց Մակարյանը։

«Եթե ամեն ինչ շարունակվի նման կերպ, Հայաստանը դժվար թե կարողանա իրականացնել լուրջ տնտեսական բարեփոխումներ։ Հաջորդ տարվա բյուջեի պակասուրդն ավելի բարձր է և կազմում է 400 մլն դոլար։ 2015 թ.–ին պակասուրդն ավելի քիչ էր», –  ասաց նա։

Փորձագետի խոսքով`կառավարության համար այդ պակասուրդը լրացնելու աղբյուրներն արտաքին ֆինանսական ռեսուրսներն են։

Մակարյանը կարծում է, որ որակյալ աշխատուժի արտահոսքը հիմնական խնդիրներից մեկն է, որի պատճառով Հայաստանում անհնար է տնտեսական աճ։

ՀՀ կառավարությունը հոկտեմբերի 1–ին հաստատել է 2016 թ.–ի պետբյուջեի նախագիծը, ըստ որի` ՀՆԱ–ի իրական աճը 2016 թ.–ին նախատեսված է 2,2 տոկոսի չափով։ ՀՆԱ–ի դեֆլյատոր–ցուցիչը նախատեված է 4 տոկոսի սահմանում, 12–ամսյա գնաճը` 4 տոկոսի սահմանում (±1,5%), իսկ պետբյուջեի պակասուրդը` ՀՆԱ–ի 3,5 տոկոսի չափով։ Ծախսային մասը կկազմի 1 տրիլիոն 373,7 մլրդ դրամ, իսկ եկամտային մասը` 1 տրիլիոն 183 մլրդ դրամ` 197 մլրդ դրամի չափով պակասուրդի դեպքում ($1 – 473,08 դրամ)։–0–