Арнайы экономикалық аймақтар экономиканың өсім нүктесіне айнала ала ма?

АСТАНА. ҚазАқпарат - Мемлекет басшысы Нұрсұлтан Назарбаев дағдарысты жылдарға қатысты жаңа экономикалық саясатты айқындағанда инвестициялар тарту мәселесін ең маңыздылардың қатарында атағаны белгілі. Бұл үшін Индустриялық-инновациялық дамудың мемлекеттік бағдарламасымен қоса елімізде қолға алынған Арнайы экономикалық аймақтарға барынша мән берілген. Соның арқасында Қазақстан Орталық Азия аймағындағы инвестициялық хабқа айналуы тиіс. Әлбетте, жаһандық дағдарыс дамуды тежеп тұрған тұста елге шетелден инвестиция әкелу, Қазақстанға келген инвесторларға жағдайларды жан-жақты жасап, олардың елді дамыту ісіне бекем кірісуі үшін «климатты» жақсартып ұстау да оңай шаруа емес. Дегенмен, мамандар арнайы экономикалық аймақтарды дамыту арқылы оны инвестиция тартудың ең маңызды тірегіне айналдыруды көздеп отырғаны да бекер емес.