Էլեկտրաէներգիայի սակագները հիմնավորված են, ասել է վարչապետը
ՀՀ վարչապետ Հովիկ Աբրահամյանը կառավարության այսօրվա նիստում հայտարարել է, որ էլեկտրաէներգիայի սակագները հիմնավորված են, եւ դրանց փոփոխության անհրաժեշտություն չկա:
Ինչ վերաբերում է «Հայաստանի էլեկտրական ցանցեր» ընկերության կառավարման հարցին, ապա Հովիկ Աբրահամյանն ասել է, որ «այս իրավիճակում հրամայական է դարձել ընկերությունում նոր, ժամանակակից կառավարման համակարգերի ներդրումը»:
Անդրադառնալով «Տաշիր» խմբի կողմից ՀԷՑ-ի ձեռքբերմանը՝ վարչապետը հայտնել է, որ «Տաշիր» խումբը պարտավորվել է 5 տարիների ընթացքում ընկերությունում ներդնել միջազգային ստանդարտներին համապատասխան կառավարում եւ իջեցնել տեխնոլոգիական եւ առեւտրային կորուստները:
Հովիկ Աբրահամյանը հիշեցրել է, որ «Տաշիր» խմբի նախագահ Սամվել Կարապետյանը պատրաստակամություն է հայտնել իր անձնական միջոցների հաշվին մինչեւ 2016թ. օգոստոսի 1-ը կառավարության հետ հավասար հիմունքներով փոխհատուցել սակագների տարբերությունը՝ ամսական մինչեւ 250 կՎտ էլեկտրաէներգիա օգտագործող բնակչության եւ փոքր բիզնեսի համար:
«Ավելի մեծ սպառում, այսինքն՝ ավելի մեծ ֆինանսական հնարավորություններ ունեցող քաղաքացիները, կարծում եմ, պետք է իրենց վրա վերցնեն օբյեկտիվ իրավիճակով պայմանավորված սակագների տարբերությունը»,- ասել է Հովիկ Աբրահամյանը:
Վարչապետը էներգետիկայի եւ բնական պաշարների նախարար Երվանդ Զախարյանին հանձնարարել է երկշաբաթյա ժամկետում, խորհրդակցելով «Տաշիր» խմբի ներկայացուցիչների հետ, ներկայացնել իրավական ակտի նախագիծ՝ համապատասխան մանրամասն հաշվարկներով: