Չինաստանը կարեւորում է Իրան-Հայաստան երկաթուղու կառուցումը
ՀՀ վարչապետ Հովիկ Աբրահամյանն այսօր Պեկինում հանդիպել է Չինաստանի Արտահանման-ներկրման բանկի խորհրդի նախագահի տեղակալ Լյու Լյանգի հետ:
Ինչպես հաղորդում են ՀՀ կառավարության մամուլի ծառայությունից, զրուցակիցները քննարկել են Չինաստանի Արտահանման-ներկրման բանկի մասնակցությամբ Հայաստանում մի շարք ներդրումային ծրագրերի ֆինանսավորման հնարավորությունները, համագործակցության նախատեսվող ուղղությունները:
Հովիկ Աբրահամյանը կարեւորել է տնտեսության մեջ չինական ընկերությունների ներգրավվածությունը: Նրա խոսքով՝ վերջին տարիներին չինական կողմի հետ քննարկվել են Հայաստանում մի շարք մեծածավալ ներդրումային ծրագրերի, այդ թվում՝ Հայաստանի հարավային երկաթգծի կառուցման հնարավորությունները:
Լյու Լյանգն էլ ընդգծել է, որ շահագրգիռ են խորացնել ՀՀ-ի հետ տնտեսական հարաբերությունները եւ վստահություն հայտնել, որ առաջիկայում փոխգործակցությունն էլ ավելի կընդլայնվի եւ կզարգանա: Նա կարեւոր է համարել Իրան-Հայաստան երկաթուղու շինարարությունը, որը կարեւոր նշանակություն կարող է ունենալ տարածաշրջանի զարգացման գործում: