Հայաստանի և Ադրբեջանի ԱԳ նախարարաները Նյու Յորքում կհանդիպեն ՄԱԿ ԳԱ նստաշրջանի ժամանակ

ԵՐԵՎԱՆ, 23 սեպտեմբերի. /ԱՌԿԱ/. Միավորված ազգերի կազմակերպության Գլխավոր ասամբլեայի 70-րդ նստաշրջանի աշխատանքներին մասնակցելու նպատակով ԱԳ նախարար Էդվարդ Նալբանդյանը սեպտեմբերի 24-ին կմեկնի Նյու Յորք, հաղորդում է ՀՀ ԱԳՆ մամուլի ծառայությունը։

Այցի ընթացքում նախարար Նալբանդյանը կմասնակցի Գլխավոր վեհաժողովի շրջանակներում կայանալիք բարձրաստիճան համաժողովների և հանդիպումների։

Նախատեսված է Հայաստանի արտաքին քաղաքական գերատեսչության ղեկավարի հանդիպումը ԵԱՀԿ Մինսկի խմբի համանախագահների ու Ադրբեջանի արտգործնախարարի հետ։

Նյու Յորքում Էդվարդ Նալբանդյանը կհանդիպի մի շարք երկրների իր գործընկերների հետ։ --0--