Чирлекенсем йышлă

Кăшăллă вирус алхасма чарăнмасть-ха. Раççейре пĕр талăкра 63 000 яхăн çын ку мурпа чирленĕ. 600 ытла çын вилнĕ. Чăваш Енре лару-тăру лăпкă мар. Усал амака çаклатакансем йышĕ кунсерен ӳсет. Республикăра кăшăллă вируспа пĕр талăкра 235 çын чирленĕ, 98 çын сывалнă. 6 çын пурнăçне çăлса хăварайман. Çак чиртен сыхланмалли чи шанчăклă мел – вакцинаци. Кăрлач уйăхĕн 21-мĕшĕ тĕлне 624 000 ытла çын пĕрремĕш компонентпа вакцинаци тунă. 592 000 çын икĕ компонетпа та сыхлăх эмелне яртарнă. Канмалли кунсенче сыватмăша лекнĕ çынсен шучĕ 30 процент ӳснĕ, килте сывалакансен те кăтартăвĕ ӳснĕ – 50 процента яхăн. Чирлекенсен шучĕ ӳснине кура ларусене те дистанци мелĕпе ирттерме сĕнчĕ Чăваш Республикин Пуçлăхĕ. Медицина ĕçченĕсемпе амбулатори мелĕпе сипленекенсене пулăшма волонтерсене те явăçтармалла. Çынсем йышлă хутшăнакан мероприятисене куçармалла е хальĕхе ирттермелле мар, палăртрĕ Олег Алексеевич. Эрнекун, кăрлач уйăхĕн 28-мĕшĕнче Чăваш Ен Пуçлăхĕ Патшалăх Канашне çырупа тухать. Документра тунă ĕçсене пĕтĕмлетет, малашнехи тĕллевсене палăртать. Олег Николаев унта хутшăнакансен йышне 50 процента яхăн чакарма сĕнчĕ. Унта хутшăнакансен ПЦР-тест та 2 хутчен памалла пулĕ. Кунашкал чарусем чире сарма памĕç ыттисен сывлăхне упрама май пур. Елизавета Цветкова, Юрий Марков