Буряад Уласта авиакомпанинууд налогһоо сүлөөлэгдэжэ магад

Буряад Уласай Тээбэриин яаман республика дотор бүридхэлдэ абтаһан авиакомпанинуудые эд зөөриин налогһоо сүлөөлхэ тухай хуулиин түсэл зохёобо. Буряадай Тээбэриин яаманай Тээбэри болон  холбоо  хүгжөөлгын талаар хорооной түрүүлэгшэ Юрий Санжановай олониитын зүблэлэй хуралдаан дээрэ мэдээсэһээр, иимэ хуулиин түсэл зохёохо тухай даабари толгойлогшо Вячеслав Наговицын байгша оной үшөө май соо үгэһэн байгаа.

- Абаад үзэбэл, эд зөөриин налог 2015 ондо «Бурятские авиалинии» компанида 640 мянган түхэриг бүридүүлхэ, «Панх» компанида – 220 мянгада шахаха. Энэ хуули дансын абтабал, авиакомпанинууд нэмэлтэ түлбэринүүдһээ сүлөөлэгдэжэ, эдэ мүнгэеэ өөһэдөө ашаглаха аргатай болохо. Гэхэ зуура, республикын авиа эмхинүүдэй бүхы техникэ лизингээр абтанхай, тэрэнээ өөрын мэдэлдэ оруулхын тула худалдан абаха мүнгэн хэрэгтэй. Энээнэй хажуугаар дээрэ дурсагдаһан хэмжээнэй ашаар биледүүдэй сэн тогтохо болоно, - гээд Санжанов тэмдэглэбэ.

Өөрын талаһаа, хойто нютагуудые хангадаг  «Панх» авиакомпаниин директор Константин Осин: «Мүнөө сагта Таксимо хүрэтэр тон үнэтэй билет 9,8 мянган түхэригтэ болонхой, эгээл үнэгүйнь - Нижнангарск хүрэтэр – 5,6 мянган түхэригтэ», - гэжэ хөөрэжэ үгөө.

- Энээнһээ дээшэ сэн хүнүүднай түлэхэ бэлэн бэшэ, арга шадалшьегүй. - гээд Осин онсолоо, - Иимэ байдалда эд зөөриин налогой хэмжээн ургаһан хэбээрээ, Оросой өөрын үйлэдбэриин хэрэгсэл, хабсаргалтанууд дуталдана. Тиимэһээ улас түрын талаһаа дүнгэлтэ ушаруулагдабал, одоол хэрэгтэй, саг соогоо һэн. Үнэ сэнгэйшье хямдаар барихадамнай туһатай бэлэй.

Тус хуулиин түсэл намартаа зарлагдаха Арадай Хуралай ээлжээтэ сессидэ үзэмжэдэ табигдахаар түсэблэгдэнэ. Һаядаа тус түсэл Буряад Уласай Засгай газарай хуралдаанда харагдаха гээд эндэ нэмэе.