Ռումինիայի վարչապետին մեղադրանք է առաջադրվել
Ռումինիայի վարչապետ Վիկտոր Պոնտային պաշտոնապես մեղադրանք է առաջադրվել: Նա մեղադրվում է կոռուպցիայի, մասնավորապես՝ հարկերից խուսափելու և փողերի լվացման մեջ:
42-ամյա Պոնտան այս մեղադրանքները մշտապես հերքել է և հայտարարել, թե դատախազությունը «շահարկում է հասարակական կարծիքը»:
Դատախազությունը հայտարարել է, որ ավարտել է հետաքննությունը և գործը փոխանցել Ռումինիայի գերագույն դատարանին:
Պոնտան, ով հրաժարվել էր լքել գործադիր մարմնի ղեկավարի աթոռը մինչև 2016 թվականի դեկտեմբերին նախատեսված խորհրդարանական ընտրությունները, առայժմ չի մեկնաբանել հետաքննության ավարտի մասին հայտարարությունը:
Հունիսից քննվող քրեական գործը առնչվում է Պոնտայի անցյալի գործունեությանը, երբ նա դեռևս փաստաբան էր և խորհրդարանի պատգամավոր: