«Шăплăх пики» конкурс

Шупашкарта «Шăплăх пики» ятпа йăлана кĕнĕ илемлĕхпе пултарулăх конкурсĕ иртрĕ. Унта çулсерен сывлăх çирĕплĕхĕпе ытти ачасенчен уйрăлса тăракан – хăлха илтмен пикесем хутшăнаççĕ. Мĕнле-ха вăл сцена çине ал çупнине илтмесĕр тухасси? Пирĕн пултарулăх ушкăнĕ конкурсра палăртнă Кристина Климина ăс пухакан ятарлă шкула хăнана çитсе килчĕ. Илемлĕ те килĕшӳллĕ хусканусем. Ташă мар ку, юрă шăранать иккен. Юрра алăсемпе вылятса юрланине япăх илтекенсем лайăх ăнланаççĕ. Кристина Климина кăçалхи конкурсра çĕнтерӳçĕ ята тивĕçнĕ. Пултарулăх тупăшăвĕнче кашни хутшăнаканăн илемлĕ юрăпа паллаштармалла пулнă. 2 уйăх ытла Кристина шкулти юрă-кĕвĕ вĕрентекенĕпе пултарулăхне туптанă. Тарăшни сая кайман. «Пĕрле вĕренекен тус-юлташсем, вĕрентекенсем, аттепе анне – пурте мана конкурса хутшăнма хавхалантарчĕç», – пулăшса пычĕç тет пике. КРИСТИНА КЛИМИНА: «Малтанах хам çĕнтернине эпĕ ĕненмерĕм. Кайран ăнланса илсен, питĕ савăнтăм. Ман пата чăн малтанах анне шăнкăравларĕ, мана çав тери маттур терĕ, эпĕ сан вăйсене тата сан пултарулăха яланах ĕненнĕ тесе хавхалантарчĕ». Тăрăшуллă, пултаруллă, илемлĕ те илĕртӳлĕ пикесем сывлăх енчен уйрăлса тăраççĕ пулин те сцена çинче хăйсене чăн-чăн артист пекех тытаççĕ. Çакна вĕсем «Шăплăх пики» конкурсра çирĕплетрĕç те. Кристина конкурсра чи çамрăк хутшăнакансенчен пĕри – вăл 8-мĕш класра ăс пухать. Кулленхи пурнăçра алгебра, геометри ăслăлăхĕсене кăмăлллать. Çапах та, мĕн пĕчĕкрен вăл пултарулăх патне туртăнать. ГАЛИНА ЯИЧНИКОВА: «Кристина питĕ пултаруллă, хастар ача. Кĕçĕн класра ман патра вĕреннĕ вăл. Кĕçĕн класра чухнех тĕрлĕ конкурссене хутшăннă вăл, яланах пĕрремĕш вырăнсем йышăннă. Питĕ пултаруллă, мал ĕмĕтлĕ ача вăл. Ун çĕнтерĕвĕпе питĕ мухтанатпăр». Пĕрле вĕренекенсем палăртнă тарăх, Кристина шанчăклă тус та. Йывăр самантра яланах пулăшать. «Сăмах май, Кристина çавăн пекех пăшалпа перессипе те кăсăкланать», – пĕлтереççĕ вĕрентекенсем. Кашни предметпа вăл яланах ĕлкĕрсе пырать. Конкурсра малти вырăна тухни малашне те тĕрлĕ ăмăртусене хутшăнма, çитĕнӳ хыççăн çитĕнӳ тума хавхалантарнине палăртать «Шăплăх пики». Маргарита Мельникова, Георгий Кривошеин