«Хăвăрт хурав» пур, çапах та усси çук

Сыхлăх эмелне ăша янă, «хăвăрт хурав» пур, çапах ниçта та кĕртмеççĕ. Çапла лару-тăрăва паян Чăваш Республикинче пурăнакан кашни çын лекме пултарнă, лекнĕ те. Чăнах та, QR-кодсăр халĕ чылай вырăна алăк хупă. Пур пулсан та паян вăл пулăшмарĕ. Сиксе тухнă çивĕч ыйтăва тунтикунсерен иртекен ларура та сӳтсе яврĕç. Раççейĕпех патшалăх пулăшăвĕпе тивĕçтерекен порталпа усă куракансен паян пысăк инкек сиксе тухнă – Ковид-19-тан тутарнă вакцина сертификачĕ çухалнă. Регион ĕç-хĕлне тимлекен центра кун пирки паян вун-вун çăхав килнĕ. Ытларах пайне Шупашкарпа Çĕнĕ Шупашкар хулисенче пурăнакансем çырнă. Ыйтăва татса пама чылайăшĕ сыватмăша çул тытнă. Шурă халатлисем эпир пĕлместпĕр тесе нумай енлĕ пулăшу паракан центра кайма сĕннĕ. Кунта пухăннисем пурте «хăвăрт хурав» мĕншĕн ĕçлеменнине пĕлме килнĕ. Хальхи вăхăтра QR-код кирек мĕнле алăка та уçать. Эппин, вăл кашни çын çумĕнчех пулмалла: ăна электронлă хутламра кăтартма пулать, е çавнах хут çине пичетлемелле. РАИСА ИВАНОВА: «Укçа илме кайрăм та ни перекет банкне кĕртмеççĕ, ни лавккана. Коммуналлă пулăшусемшĕн тӳлемелле, телефоншăн, çутăшăн, газшăн. Укçа çук, килте тытаймастăп. Çимелле – укçа çук. Мĕнле япала ку». Çынсен тарăхăвне ăнланма пулать, паллах. Сыхлăх эмелне шала яртарнă, анчах та çакна ĕнентерекен сертификатăн «вăйĕ» çук. АЛЕКСЕЙ ЗОТИКОВ: «Çур çул каялла привика тунине çирĕплетекен сертификат паян чăн мар е тепĕр хутчен тĕрĕслĕр текен çыру тухнă. Манăн сертификата та паян чăн мар терĕç тĕрĕслекенсем. QR-кодпа усă курма малтан çулталăк пулнă пулсан паян ирпе çур çул кăна. Каç енне лару-тăру уçăмланчĕ. Техника енчен е пĕрлехи патшалăх пулăшу паракан порталта кăлтăксем сиксе тухнă иккен». QR-код е чăвашла «хăвăрт хурав» кĕртни çынсене сыхлăх эмелне ăша яма хистет. «Кунне 500-600 çынран кая мар прививка тăваççĕ», – тет Шупашкарти тĕп больницăн тĕп тухтăрĕ Татьяна Маркелова. Иртсе кайнă кану кунĕсенче те ирхи сакăр сехетерен пуçласа каçхи çичĕ сехетчен ĕçленине палăртать вăл. ТАТЬЯНА МАРКЕЛОВА: «Кашни вакцинаци тăвакан çынна эпир ăçтан сертификат илмеллине калатпăр. Патшалах порталĕнче çырăнман çынсене эпир пичетленĕ сертификат паратпăр». Çĕршывра цифра хатĕрĕсем вăй илсе пыраççĕ. Анчах вĕсен ĕçĕ-хĕлĕнче те пăтăрмах сиксе тухма пултарать. Хут çине пичетленĕ QR-код шанчăклараххине паян кашни ăнланчĕ. Алексей Зотиков, Екатерина Шиверова, Павел Иритков, Сергей Емельянов