Սարգսյանն ու Ծառուկյանը՝ Օլիմպավանում եւ «Արարատ» կոմբինատում
Ինչպես հաղորդում են ՀՀ նախագահի մամուլի ծառայությունից, Սերժ Սարգսյանին ուղեկցել է Հայաստանի ազգային օլիմպիական կոմիտեի (ՀԱՕԿ) նախագահ Գագիկ Ծառուկյանը:
Նախագահը ծանոթացել է շինարարության ընթացքին եւ շուրջ 7500 քմ մակերեսի վրա ավելի քան 300 մարզիկի համար նախատեսված մարզաբազայում ստեղծված պայմաններին: 2013թ. մեկնարկած օլիմպիական ավանի շինարարությունը ավարտին կհասցվի 2015թ. սեպտեմբերի վերջին: Շենքի շահագործումից հետո այստեղ կտեղափոխվի նաեւ Հայաստանի ազգային օլիմպիական կոմիտեի աշխատակազմը:
Մարզաբազայում շրջայցի ժամանակ նախագահին ներկայացվել են ըմբշամարտի, ձյուդոյի, թեքվանդոյի, բռնցքամարտի, ծանրամարտի եւ խաղային մարզաձեւերի մարզադահլիճներն ու դրանց հնարավորությունները, սպորտային բժշկության եւ հակադոպինգային ծառայության կենտրոնները:
Օլիմպիական ավանի հավաքական թիմերի կենտրոնում գործելու են մենապայքարային, ուժային, խաղային, ինչպես նաեւ ջրային մարզաձեւերի դահլիճներ, իսկ հյուրանոցային մասնաշենքը նախատեսված է լինելու մոտ 320 մարզիկի համար:
Այնուհետ Սերժ Սարգսյանն ու Գագիկ Ծառուկյանն այցելել են Երեւանի «Արարատ» կոնյակի-գինու-օղու կոմբինատ: ՀՀ նախագահը շրջայց է կատարել «Արարատ»-ում, ծանոթացել կոմբինատի արդիականացման ուղղությամբ իրականացված վերակառուցման եւ վերազինման աշխատանքներին, շշալցման նոր հոսքագծերի հնարավորություններին եւ խաղողի մթերումից առաջիկայում ակնկալվող հումքի ծավալներին:
Նախագահն այցելել է նաեւ թանգարանի վերածված՝ շուստովյան ժամանակաշրջանում կառուցված կոմբինատի վարչական շենք եւ շուստովյան պատմական մառաններ:
Օլիմպիական ավանի մասին առավել մանրամասն կարող եք կարդալ այստեղ: