Чирлисем валли вырăн йĕркеленĕ

Етĕрне районĕнче ку эрнере çирĕп йĕрке. Çулсем çинче ятарлă постсем йĕркеленĕ, ытти хулапа ялтан килекенсене кĕртмеççĕ. Парикмахерскисемпе хăш-пĕр лавккасене, пасарсене хупнă, аслă çултисен урама тухмалла мар. Пурин те маска тăхăнмалла. Ку - районта коронавируспа чирлисен йышĕ кĕске хушăра ӳссе кайнипе çыхăннă. Паян Министрсен Кабинечĕн пуçлăхĕн çумĕ Алла Салаева тата Чăваш Ен сывлăх сыхлав министрĕ Владимир Степанов Улатăрта пулчĕç. Кунта çак эрнере чирлисен йышĕ виçĕ хут ӳснĕ, паянхи куна 60 ытла çынна ковид 19 диагноз лартнă.