Ադրբեջանը պարտադրում է փակել «Ռուսական տունը» Բաքվում

Նոտայի մեջ նշվում է, որ «Ռուսական տունը» տեղական օրենսդրությամբ պետք է գրանցվի որպես իրավաբանական անձ։

Ինչպես հաղորդում է ՏԱՍՍ-ը, Եվգենի Պրիմակովը «Россия-24» հեռուստաալիքի եթերում ասել է, որ Մոսկվան միշտ պատրաստ է եղել գրանցման, սակայն նրա դիմումները Ադրբեջանի իշխանություններին անպատասխան են մնացել։

«Ռոսսոտրուդնիչեստվոյի» ղեկավարը նշել է, որ Բաքվում գտնվող «Ռուսական տունը» պետք է մեկուկես ամսվա ընթացքում ազատի վարձակալվող տարածքը, քանի որ վարձատուն տեղեկացրել է մոտ ապագայում այն վաճառելու մտադրության մասին:

Պրիմակովն ընդգծել է, որ Բաքվում «Ռուսաստանի տան» եւ ԱՄՆ Միջազգային զարգացման գործակալության (USAID) գործունեության համեմատությունը «որեւէ քննադատության չի դիմանում, քանի որ «Ռոսսոտրուդնիչեստվոն» չի զբաղվում քաղաքական հարցերով՝ ի տարբերություն ամերիկյան կառույցի»։