«Бәби көтә иде». 22 яшьлек кыз өстенә биек йорттан перфоратор төшкән

Мәскәүдә Сталин заманында төзелгән биек йортны реконструкцияләгәндә 22 яшьлек хатын-кыз имгәнгән. Аның өстенә биеклектән перфоратор төшкән. Хатын-кыз бәби көтә булган. Бу турыда «Московский комсомолец» хәбәр итте.

Вакыйга 15 августта була. 15 атна чамасы йөкле хатын-кыз биек йорт яныннан бара. Шул чакта аның өстенә перфоратор кисәге килеп төшә. Хатынның баш мие селкенә, борыны имгәнә. Бәхеткә, карындагы балага зыян килмәгән.

Яшь хатын көн саен диярлек шушы йорт яныннан узып йөрүен әйтә, ул якында гына урнашкан таможняда эшли. Фаҗига булган көнне ул хастаханәгә барган, аннары кабат эшенә килеше булган. Өстән әйбер төшкәч, аңын югалтып егылган. Узып баручылар «ашыгыч ярдәм» чакырган.

«Аллаһка шөкер, балама зыян килмәде. Менә борыным, күзем, битем бик авырта, шеште. Косасым килә, башым әйләнә. Аннары мин өстемә зур тимер кисәге – төзелеше перфораторы насадкасы, аның белән плитканы тишәләр, 25 см чамасы зурлыкта – төшүен белдем. Ул әле очлы да иде», – дип сөйли яшь хатын.

Ул полициягә гариза язган, гаеплеләрне җәзага тартуларын тели, диелә хәбәрдә.