Уфада яшәүче хатын-кыз пенсионерны һәм аның кызын мошенниклардан коткарган

Уфада яшәүче 61 яшьлек хатын-кызның өй телефонына ир-ат шалтырата һәм үзен дәүләт органы хезмәткәре дип таныштыра. Ул хатын-кызга 1,5 млн сум «акчалата компенсация тиеш» дип хәбәр итә. Акчаларны алу өчен, хатын-кыз аңа СМС хәбәрдәге кодны атый.

Бер сәгать узгач икенче шалтырату була, бу юлы «Роскомнадзор хезмәткәре» шалтырата. Ул пенсионерның бөтен милкенә дошман ил файдасына ялган ышанычнамә теркәлгән булуын әйтә. Бу ышанычнамәне гамәлдән чыгару өчен, аны Үзәк банкның ялган хезмәткәре белән тоташтыралар. Ялган банкир хатын-кызга имин счетка 840 мең күчерергә тәкъдим итә. Аның күрсәтмәләре буенча пенсионер, 36 яшьлек кызы белән, акча алырга теләп, банк бүлекчәләренә бара. Бу хакта Башкортстан буенча Эчке эшләр министрлыгына сылтама белән «Башинформ» яза.

Икенче көнне җинаятьчеләр шәһәрдәге сәүдә үзәгендәге бер банкоматны билгели, һәм әни белән кыз шуның аркылы акча күчерергә тиеш була. Мошенникларның дистанцион контролендә пенсионер хатын кәгазь акчалар кертә – «белгечләр» әйткән счетка күчерә башлый. Тик бу вакытта сәүдә үзәгендә булган 41 яшьлек хатын-кызны пенсионерканың үз-үзен сәер тотышы һәм гел телефоннан сөйләшеп торуы җәлеп итә. Ул зыян күрүчеләрдән: «Мошенникларга акча салмыйсызмы?» – дип турысын сорый. Тик аны дорфа гына кире кагалар. Шуңа да карамастан, уяу ханым аларның мошенниклар басымында булуын аңлый һәм бу сәер хәл турында полициягә хәбәр итә.

Берничә минуттан полиция хезмәткәрләре килеп җитә. Сорау алган вакытта, зыян күргән пенсионер хатын аферистларга 195 мең сум күчереп өлгергән була инде. Ә калган 655 мең сумны алып, кире хуҗасына кайтаралар.

Бу мошенниклыкка комачаулаган 41 яшьлек хатын-кызны, бүләкләү өчен, полиция бүлегенә чакырачаклар.