Apple App Store-da komissiyanı azaltmaq niyyətindədir – amma bu, sizə xoş gəlməyə bilər

Apple şirkəti Epic Games ilə məhkəmə prosesindən sonra App Store-dakı «vergi»ni (komissiyanı) azaltmağı düşünür. Bloomberg jurnalisti Mark Qurmanın sözlərinə görə, bu addımın məqsədi — iri tərtibatçıların Apple-dan uzaqlaşmasının qarşısını almaqdır. Ancaq şirkət belə bir qərar verərsə, App Store-dan əldə olunan milyardlarla gəlirin başqa yerdən kompensasiya olunması lazım gələcək. Qurmanın fikrincə, bu da iPhone-ların qiymət artımı ilə nəticələnə bilər.

Apple il ərzində App Store komissiyalarından təxminən 20 milyard dollar qazanır. Komissiya dərəcəsi dəyişkəndir — 15% ilə 30% arasında. Ancaq Epic Games kimi iri şirkətlər üçün Apple kimi vasitəçilər artıq arzuolunan deyil. Onlara platforma lazımdır, amma böyük faizlə pul ödəmək yox. Elə buna görə də məhkəmə prosesi baş verdi və nəticədə ABŞ App Store-da tərtibatçılara öz ödəniş keçidlərini yerləşdirmək imkanı verildi.

Bu dəyişiklik Apple üçün ciddi gəlir itkisinə səbəb ola bilər. Çünki Epic Games nümunəsini əsas götürərək, Spotify kimi digər böyük şirkətlər də App Store-dan yan keçərək öz ödəniş sistemlərini istifadə etməyə başlayacaqlar. Apple həm böyük, həm də orta və kiçik miqyaslı tərtibatçıların öz platformasında qalmasını istəyir və bu səbəbdən komissiyanı azaltmağı və ödənişləri sadələşdirməyi planlaşdırır. Halbuki indiki sistemdə sadəcə iki kliklə ödəniş etmək kifayətdir – bundan daha sadə nə ola bilər?

App Store-dan gəlir azalarsa, Apple bu itkiləri başqa yollarla kompensasiya etməlidir. Elə bu vaxt ABŞ-ın tətbiq etdiyi ticarət tariflərini bəhanə edərək, iPhone-ların qiymətini artırmaq üçün fürsət yaranır. Təbii ki, bizə bunu “innovativ texnologiyalar və yüksək keyfiyyətli materiallar”la əsaslandıracaqlar, amma əslində bu daha çox marketinq hiyləsidir.

The post Apple App Store-da komissiyanı azaltmaq niyyətindədir – amma bu, sizə xoş gəlməyə bilər appeared first on InfoCity.