«Мин вәгъдә иттем»: Зәмирә Рәҗәпова тәүге җырын яздырган

Зәмирә Рәҗәпова җыр яздырган. Тәүге җыры «Сандугач моңы» дип атала. Җырның сүзләрен Марат Кәбиров, көен Ризван Хәкимов иҗат иткән.

Сез бик күп тапкырлар сорадыгыз, мин вәгъдә иттем! Вәгъдә – иман! Яратырсыз, дип уйлыйм!

Ниһаять, бу көн җитте! Чыкты бу җыр! Бөтен мәйданнарда да бар. «Алиса»дан сорап, тыңлый аласыз… Рәхмәт мәхәббәтегез һәм хөрмәтегез өчен. Мин – җырчы булмаган кешегә сезнең теләктәшлек канатлар куя, – дип игълан итте ул иҗат җимешен. Бу җырны ул Башкортстандагы радиога да биргән.

«Сез берәү генә бу җырны матур итеп җырлыйсыз, исән-сау булыгыз!»;

«Бу җырны Зәмирәдән дә матур итеп җырлаучы юк, минемчә. Шул хәтле йөрәккә үткәреп җырлый»;

«Үзәкне өзә инде»;

«Бик яратабыз җырлавыңны, сөйләвеңне, гомумән, барлыгыңны»;

«Без Казахстанда, «ТНВ-Планета» каналыннан Сезне караганда, һәрвакыт соклана идек. Ул сездән башка бушады. Сез – талантлы, сөйкемле хатын-кыз, уңышлар. Миңа 73 яшь»;

«Булганнан бар да була», – дигән сүзләр язып калдырганнар Зәмирә Рәҗәповага.

Аны Зифа Нагаева да: «Афәрин, Зәмирә», – дип бәяләгән.

«Стартта сезнең җыр тора, Зифа апа. Ин шәәә Аллаһ», – дип, яңа җыр әзерләвен хәбәр иткән Рәҗәпова.