«Бала тудыру йортыннан чанада, юрганга төренеп кайталар»: читтәге татарлар юлсыз интегә

Төмән өлкәсе Тубыл районындагы сазлыкларда урнашкан татар авыллары быел кышкы юлларсыз калган. Авылларга машиналар керә алмый. Кешеләр өйләренә, элеккечә, юрганнар белән төренеп, агач арбаларда гына кайтып җитә ала. Дөрес, хәзер ат җигелми, арбаларны «Буран» мотоциклларына тагалар икән.

«Себер татар дөньясы» дигән телеграм-каналда арбада кайтучы кешеләр төшерелгән видео урнаштырганнар. «Менә шулай «Буран» мотоцикларына утырып, хатын-кызлар, кечкенә балалар белән өйгә кайтырга туры килә. Төмән өлкәсе ниндидер таш гасырда яшәгән кебек», – дип аңлаталар каналда.

Сүз Лайтамак, Ишменева, Акира, Ләңче (Иземеть) авыллары турында бара.

«Без 30 декабрьдә шәһәрдән снегоходлар белән кайтып җиттек. Хатын-кызлар яңа туган сабыйлары белән бала тудыру йортыннан соң өйләренә шулай ук кышкы мотоцикл белән кайтырга мәҗбүр булды. Башка елларны кышкы юлларны ачалар иде, ә быел проблема килеп туды», – дип язганнар Себер якларында татар авылларында яшәүчеләр. Алар бу проблема белән 72.RU редакиясенә мөрәҗәгать иткән. Редакция хезмәткәрләре аларга администрациядә телефонны алмаулары, хат аша сорау юллаулары турында хәбәр юллаган.