Канашта кибет хуҗасын атып үтергән «Кыш бабай»ны авылда тотканнар, җинаять сәбәбе билгеле

Чувашиянең Канаш шәһәрендә Кыш бабай киеме кигән кеше эшмәкәр ир-атны атып үтергән. Җинаятьче урыннан качып киткән. Аны соңрак тоткарлаганнар. Бу турыда РЕН ТВ хәбәр итте.

Кибет хуҗасына һөҗүм 2 гыйнварда була. Җинаятьче кибеткә мылтык тотып килә, ул Кыш бабай киеме кигән, аягында ак итек була. Битенә сакал ябыштырган, күзлек кигән.

«Кыш бабай булып киенгән ир-ат кибет хуҗасы Юрий Суракинга мылтыктан 2 тапкыр ата. Яраланган Юрий вафат була», – дип язган «112» телеграм-каналы.

Җинаять эше ачылган. Үтерү сәбәбе билгеләнә, диелә хәбәрдә.

Соңрак РЕН ТВ Тикшерү комитетына сылтама белән хәбәр иткәнчә, үтерүнең якынча сәбәбе – акча бурычы.

«Җинаятьтә шикләнелүче кеше шәхесе ачыкланды. 3 гыйнварда ул үзе яшәгән урында – Канаш округындагы бер авылда тоткарланды», – дигәннәр ведомствода.

Тикшерү версиясе буенча, эшмәкәр ир-атның Кыш бабай булып киенгән ир-атка акча бурычы була.

Җинаятьтә шикләнелүче кешене Росгвардия хезмәткәрләре тоткарлаган. Ведомство шул урыннан кадрлар күрсәтте.