Са Святам Божага Нараджэння! Біскуп Віцебскі Алег Буткевіч звярнуўся з віншаваннем да вернікаў і ўсіх беларусаў
“… Вочы мае ўбачылі збаўленне Тваё, якое Ты падрыхтаваў перад усімі народамі” (Лк 2,30-31).
Гэтыя словы прарока Сімяона, які чакаў сустрэчы з Месіяй, перадаюць глыбокую радасць і надзею. Гэтыя пачуцці напаўняюць не толькі яго сэрца, але і ўсё чалавецтва. Крыніцай гэтай радасці і надзеі з’яўляецца сам Езус Хрыстус – абяцаны Месія, які прыйшоў у свет як сапраўдны Бог і сапраўдны Чалавек. Ён прынёс людзям слова Праўды і дар сваёй ласкі і Любові.
Каб глыбей адчуць значэнне свята Божага Нараджэння, неабходна вера. Вера ў тое, што наша жыццё мае сэнс, што мы не з’яўляемся выпадковымі падарожнікамі ў гэтым свеце, а сам свет мае разумную і любячую Прычыну. Гэтыя перакананні дапамагаюць нам будаваць гармонію ў нашым жыцці, з людзьмі і прыродай, а таксама смела сутыкацца з цяжкасцямі і нават з заканчэннем жыццёвага шляху. У такім выпадку святочныя атрыбуты – Дзіця ў яслях, елка, ілюмінацыя і падарункі – не стануць пустымі сімваламі, але будуць знакамі Божай Любові, адкрытай для нас усіх.
Адкрытае сэрца на Божую Любоў – гэта галоўнае. Без гэтай любові мы не змаглі б адчуваць сапраўдную блізкасць ад родных, сяброў і нават нашых бацькоў. Бог прыходзіць у свет як маленькае Дзіця, каб мы адважыліся прыняць гэты велізарны Дар і падзяліцца ім з іншымі. Таму на гэтае свята паглядзім на людзей вакол нас праз прызму Божай Любові: на тых, хто патрабуе нашай увагі, дапамогі, прабачэння або проста усмешкі. Прымем усіх, незалежна ад іх перакананняў, статусу або веры, з міласэрнасцю і разуменнем.
Езус Хрыстус прыйшоў для ўсіх – асабліва для тых, хто найбольш патрабуе падтрымкі і духоўнай дапамогі. Няхай Яго Нараджэнне стане для нас крыніцай супакою, згоды, узаемнай павагі і прымірэння. Няхай Яго святло і дабрыня напоўняць кожнае сэрца, кожны дом і ўсю нашу Беларусь радасцю, духоўнай моцай і бласлаўленнем.
Са святам Божага Нараджэння і з надыходзячым Новым 2025 годам!
Алег Буткевіч
Біскуп Віцебскі
The post Са Святам Божага Нараджэння! Біскуп Віцебскі Алег Буткевіч звярнуўся з віншаваннем да вернікаў і ўсіх беларусаў first appeared on Витебский Курьер.