Матвиенко Марат Хөснуллинга теркәлмәгән йортта яшәгән өчен салымнарын түләргә кушты

Федерация Советы Рәисе Валентина Матвиенко Россия вице-премьеры Марат Хөснуллинга 8 ел буе теркәлмәгән йортта яшәгәндә җыелган салымнарын түләргә тәкъдим иткән. Бу хакта ул парламентның югары палатасында узган хөкүмәт сәгатендә әйткән, дип яза РБК.

«Сез теркәлмәгән йортта 8 ел яшәвегезне ачыктан-ачык әйттегез, узган число белән салымнар түләргә туры киләчәк бит. Башкаларга үрнәк күрсәтегез», – диде Матвиенко.

Хөснуллин «Тормыш өчен инфраструктура» илкүләм проектын (аны 2025 елда эшләтеп җибәрү планлаштырыла) тәкъдим итеп, төзелгән йортларны вакытында теркәмәү мәсьәләсен күтәрде. Презентациядән соң сенаторларның бер соравына җавап биреп, ул 8 ел теркәлмәгән йортта яшәве турында сөйләде, чөнки аңа «кәгазьләр буенча күрше ДПда электр куәт запасы булмау аркасында» электрга тоташтырырга рөхсәт бирмәгәннәр.

«Фактта мин аны төзелеш мәйданчыгы буларак тоташтырдым һәм яшәдем. Юридик яктан туры килми, өем төзелеп бетмәгән иде», – дип аңлатты вице-премьер.

Элегрәк Дәүләт Думасы төзелгән объектларны теркәргә мәҗбүр итә һәм аларны исәпкә куелганчы кулланырга мөмкинлек бирми торган закон проектын беренче укылышта кабул итте.