Гөлназ Шәрипҗанова: «Мин – 35 яшькә җитеп, ботокс кулланмаган кеше»

«ТНВ-Татарстан» телеканалының социаль челтәрдәге сәхифәсендә «Ә син?» тапшыруын алып баручы Әбри Хәбриев җырчы Гөлназ Шәрипҗанованы кунак итеп чакырган. Артист комплекслар турындагы сорауга җавап бирде.

Ә.Х.: Комплексларың бармы?

Г.Ш.: Мин блефаропластика ясаттым, ягъни күз кабагының формасын үзгәрттем. Бер күземнең кабагы күбрәк төшкән иде. Миңа макияж ясаганда, «стрелкалар» ясарга кыен иде. Ясаттым да, хәзер «кайф», «красотка» бит. Үзем белән канәгать, шулай булганда, тагын да күбрәк эшләр башкара алам.

Ә.Х.: Йөздә барлыкка килгән дефект нәрсәдер турында сөйли. Мисал өчен, күз төбе караңгыланып торуга карап, табиблар ниндидер чир булуны белә ала. Ә син андый җитешсезлекләрне алып атасың һәм организмда проблемалар булганын белми каласың. Мин гомер буе кыек күз белән йөрим әле.

Г.Ш.: Әбри, без бит хатын-кыз турында сөйлибез. Мин бит үз белдегем белән нәрсәдер эшләмәдем, белгечкә барып, киңәшләшеп эшләдек. Мин – 35 яшькә җитеп, ботокс кадамаган кеше. 20 яшьлек кызларның маңгайлары каткан ботокстан. Минеке барысы да үземнеке, икенче ияк тә. Иренем кабартылган, анысы да 2 ел элек.