«Кешеләрнең кабәхәтлегенә аптырап куям»:Данир Сабиров үзен гаепләүчеләргә җавап әзерләгән

Узган елның октябрендә Данир Сабировның күршесе Ирек абыйның йорты янып беткән иде. Миләүшә һәм Данир Сабировлар терәлеп торган күршеләренә ярдәм итәргә алынды. Алар яңа йорт салу өчен акча җыю оештырды, ә җәй көне инде йортны төзеп тә бетерделәр. Шушы өйне күрсәтеп видео төшергән Сабировларны социаль челтәрдә гаепли дә башлаганнар. Кайберәүләр фикеренчә, шушы йортны алар үзләренә калдырырга җыена.

«Кердек күршегә, аның ачкычлары бездә. Бу йорт турында әллә нинди сүзләр йөри. Кайбер кешеләрнең кабәхәтлегенә аптырап та куям инде. Янәсе, бу йорт безгә кала, шуңа төзибез икән. Аның балалары юк, дип язалар. Балалары бар – 2 кызы бар. Кемнәрдер: «Нигә балалары булышмый?» – ди. Балалары да булдыра алганча булыша. Бөтенебез ярдәм итә. Ярдәм итүчеләргә рәхмәт кенә. Әле Әгерҗедән Илнур исемле дустым, күршегә дип, бер урынлы 3 карават китерде. Ирек абый рәхмәт әйтте.

Ремонтны эшләргә дә күпме чыгым кирәк. Безне ничек өй төзергә дә өйрәтәләр әле. Ирек абый ничек теләде, шулай төзедек. Иске фундамент буенча шундый ук размердагы өй төзедек. Хәзерге вакытта мондый йорт төзү 8,5 миллион сум тора. Язылучыларыбыз ярдәме белән 3 миллион сум җыелды, аннан Ирек абыйның 1 миллион сум страховкасы бар иде – барысы да монда кереп бетте. Калганы инде – хәлле дусларым ярдәме белән», – дип сөйли артист.

Аның сүзләренчә, дуслары түбәгә материал кайтару, газ кертү, янгын урынын чистарту һәм башка мәсьәләләрдә ярдәм иткән.

«Чаллыдан бер тамашачы «котел» бүләк иткән. Аллаһка шөкер, яхшы кешеләр бар. Дуслар, әллә нинди мимешләргә ышанып йөрмәгез», – ди ул.

• Данир Сабировның терәлеп торган күршесе янган: «Кызы һәм оныгы яраланды»
• Данир Сабировның күршесенең йорты төзелеп беткән, ә аның күршесе канәгатьсезлек белдерә