Кабачкиның зыяны да бар! Файдалы итеп пешерү ысулы нинди?

Табиб-диетолог Валерий Герасимов кабачкиның зыянлы үзлекләрен әйткән. Бу турыда «Газета» ру яза.

Кабачкиның файдасы ул үскән туфракка бәйле. Белгеч сүзләренчә, яшелчәләргә химикатлар сипсәң, ул кеше сәламәтлеге өчен зыянлы булырга мөмкин.

Кабачкины пешерү ысулы да аны зыянлы итәргә мөмкин. Күп иттереп май салып кыздырсаң, кабачки майны үзенә сеңдерә дә канда холестерин микъдарын арттыра.

Табиб кабачкины томалап пешереп ашарга киңәш итә. «Ит белән фаршировать ителгән кабачки һәм баклажан – сезонлы яшелчәләр белән уйлап табарга мөмкин булган иң файдалы ризык. Анда клетчатка да, аксым да була», – ди Герасимов.

Россия бакчачылар берлеге эксперты Ольга Ворона кабачкины караңгы, салкын һәм коры урында сакларга киңәш итә. Каты кабыклы кабачки мартка кадәр сакланырга мөмкин. Ләкин эксперт, кабачкины туңдырып кую яхшырак, ди.

• «Майда кыздырмагыз, чиләкләп ашамагыз» – Кабачкиның нинди файдасы бар?