Актанышта аюлар умарталыкны туздырган: юлда бәрдереп үтергән балалары өчен үч алуларымы?

Хәер, актанышлыларның аю күрүләре тәүге тапкыр түгел инде. Әмма моңарчы, ялгышмасам, Яңа Әлемдә бер агай аю күрүе турында халыкка сөйләгәч, ышанмадылар. Я «башы киткән», я «салметдин баштан күзенә күренгән» дип, агайны уңайсыз хәлгә калдырдылар.

Ә хәзер аюның видеолары чыкты. Берничә көн элек Актанышның Киров авылында аю балаларын машина белән бәрдереп киткән кадрлар чыкты.

Бер көн үтүгә, районның Яңа Балтач авылындагы элеккеге колхоз умарталыгына да аюлар төшкәне билгеле булды. Төшкән генәме соң? Рәхәтләнеп, «аю туе» ясап киткәннәр… Умарталыкка шактый зур зыян килгән. Әллә соң бу – аюларның балаларын бәрдергәннәре өчен кешеләрдән үч алуларымы?..

«Монда 3 аюдан да ким бумаган. Алар парлап, агачка ешына-ешына барганнар. Умарталарны туздырып сыйланганнар», – дип, җан ярсуын әйтеп сала умартачы абзый.

Актаныш районы авыл хуҗалыгы һәм азык-төлек идарәсенең җитештерү бүлеге баш белгече Рил Әхмәтҗанов «Интертат»ка умарталыкка үзе дә барып карап кайтуын әйтте. Рил абый сөйләвенчә, аю эзләре умарталыкта күренә, умарталарны аударып беткәннәр, бал белән сыйланганнар... Ул бу аяныч хәлләрнең нәтиҗәсен видеога да төшереп алды...

P.S. Урман-болыннарга әле бик барып йөрмәскә тырышыгыз. Аеруча Актаныш районы һәм тирә-як район һәм җирлекләр халкына бу киңәшебез!