Мәктәптә тагын чүкеч һәм пычак белән һөҗүм, балалар яраланган
Иркутск өлкәсе Балаганск бистәсендә чүкеч һәм пычак белән коралланган укучы сыйныфташларына һөҗүм иткән. Ким дигәндә 3 укучы зыян күргән. Берсенең башы тишелгән, икесенең куллары имгәнгән. Физик тәрбия укытучысы вакытында килеп кергәнгә күрә, укучылар җитди булмаган җәрәхәтләр ала. Бу хакта «Mash» телеграм каналы яза.
Барысы да тәнәфестә булган. Сигезенче сыйныф укучылары физик тәрбия дәресенә әзерләнгән. Чишенү бүлмәсендә Артем Б. егетләрнең берсенә ташлана, баш артына эләгә. Аннары кычкыра башлый һәм кулларына да берничә тапкыр сугып ала.
Тиздән физик тәрбия укытучысы килеп җитә һәм аны коралсызландыра. Малай яхшы, тулы гаиләдән. Аның 5 яшьлек энесе бар.
«SHOT» мәгълүматлары буенча, һөҗүм мәктәптә тәнәфес вакытында 10:30 да була. Хәзер полиция хезмәткәрләре һөҗүм иткән баладан сорау ала, фаҗиганың сәбәпләре ачыклана.
Узган атнада шундый ук фаҗига Чиләбе мәктәбендә булган иде. Анда 13 яшьлек 7нче сыйныф укучысы Рома дәрес тәмамланырга 5 минут кала кабинетка бәреп кереп, 2 тапкыр пистолеттан аткан һәм сыйныфташларына чүкеч белән һөҗүм иткән иде. Малай мәктәпкә пычак, чүкеч, пневматик пистолет муляжы алып кергән. Барысы да рюкзагында булган. Яшүсмерне зарарсызландырырга химия укытучысы, 57 яшьлек Нина Шошина һәм һөҗүм итүченең сыйныфташы – 13 яшьлек Андрей ярдәм иткән. Барлыгы 5 кеше зыян күргән. Рома психоневрологик диспансерда исәптә тора. Аны хастаханәгә салганнар, кулында тирән булмаган яра бар. Укучыны мәҗбүри дәвалануга җибәрәчәкләр.
Беренчел мәгълүматлар буенча, үзенең сыйныфташларына чүкеч белән һөҗүм иткән укучы, онлайн-уенда бирем үтәгән. Һөҗүмнән соң ул үз-үзенә кул салырга ниятләгән булган, дип хәбәр итә «Baza» телеграм каналы.
Бер мәктәп укучысы сүзләренчә, һөҗүмнән соң Артем моның «Телеграм»дагы уенда бирем булуын сөйләргә өлгергән. Шул ук вакытта, аның сүзләренчә, ул үзе үк аңа бирем бирүләрен сораган. Биреме – мәктәпкә һөҗүм итү һәм үзенә кул салу булган, янәсе. Нәтиҗәдә Артем Олегның башына, шулай ук тагын 2 сыйныфташына сугарга өлгергән.
Фотода Олег
Фото: © «Baza» телеграм каналы