«Барселона» президенти Хавининг Месси ҳақидаги даъволарига жавоб қайтарди

«Барселона» клуби президенти Жоан Лапорта бўлажак сайловлар олдидан ўтказилган дебатда собиқ мураббий Хави Эрнандесга нисбатан кескин танқидлар билан чиқди. Лапорта Хавини профессионал фаолиятида оилавий ҳаёт ва ишни мувозанатда ушлай олмаганликда ҳамда доимий норозилик кайфиятида бўлганликда айблади. Президентнинг сўзларига кўра, Хави жамоанинг Европадаги рақобатбардошлигига шубҳа билан қараган ва доимо таркибдан норози бўлган. Бу ҳақда goal.com хабар беради.

Шунингдек, Лапорта Лионель Мессининг 2023 йилда клубга қайтиши блоклангани ҳақидаги гапларга ҳам ойдинлик киритди. Хавининг таъкидлашича, Месси «Барселона»га қайтишни истаган, бироқ Лапорта сиёсий босимдан қўрқиб, трансферга тўсқинлик қилган. Бироқ, Лапорта буни рад этиб, Мессининг отаси Хорхе Месси билан музокаралар олиб борганини ва якунда футболчининг ўзи босимдан қочиб, «Интер Майами»ни танлаганини маълум қилди.

Дебат давомида Лапорта рақиби Виктор Фонт билан ҳам баҳслашди. Фонт клуб раҳбариятини тарихнинг энг яхши футболчиси билан алоқаларни узганликда айблади. Лапорта эса спорт директори Декони ҳимоя қилиб, Фонтнинг режалари жорий мураббий Ханси Фликнинг ишига салбий таъсир кўрсатиши мумкинлигидан огоҳлантирди. Ўз навбатида, Флик бу можароларга аралашмасликни маъқул кўрмоқда.