Дональд Трамп Эрон ва унинг иттифоқчиларига янги зарбалар беришни ваъда қилди

АҚШ президенти Дональд Трамп 7 март куни Эрон ва унга алоқадор гуруҳларга қарши янги ҳарбий зарбалар берилишини маълум қилди. Президент ўзининг Трутҳ Соcиал саҳифасида Эроннинг хатти-ҳаракатлари туфайли шу пайтгача нишонга олинмаган ҳудудлар ва шахслар гуруҳи йўқ қилиниши мумкинлигини таъкидлади. Трампнинг сўзларига кўра, Америка ва Исроилнинг қўшма амалиётлари Эрон таслим бўлмагунча ёки бутунлай қулаб тушмагунча давом этади.

Ушбу баёнот Эрон президенти Масъуд Пизишкиённинг Форс кўрфази давлатларидан ракета ва дрон ҳужумлари учун узр сўраганидан сўнг янгради. Эрон раҳбари, агар мамлакатига ҳужум қилинмаса, қўшни давлатларга зарба бермасликка ваъда берган эди. Бироқ Трамп бу узрни Эроннинг мағлубияти сифатида баҳолади. Унинг фикрича, Эрон айнан АҚШ ва Исроилнинг шафқатсиз ҳужумлари туфайли ўз позициясидан воз кечишга мажбур бўлган.

Трамп Эронни Яқин Шарқдаги вазиятни издан чиқарганликда айблаб, мамлакат эндиликда минтақадаги ўз таъсирини йўқотганини қўшимча қилди. Президентнинг таъкидлашича, Эрон аввалги «жангари» мақомидан айрилиб, «омадсиз» давлатга айланган. Ҳозирги вазиятда Вашингтон ва Тель-Авив ўз ҳарбий босимини янада кучайтириш ниятида эканлигини очиқ намойиш этмоқда.