Арбелоа ЖЧ олдидан эҳтиёткор ўйинчиларни тушунмайман деди

Мадриднинг «Реал» клуби мураббийи Альваро Арбелоа жаҳон чемпионати бўладиган йил футболчилар учун қандай кечиши ҳақида фикр билдирди. Бу ҳақда euro-football.ru хабар беради.

Матбуот анжуманида унга яқинда ўзи ҳам футболчи бўлганини эслатиб, ЖЧ йили ўйинчилар кучини қандай тақсимлаши кераклиги сўралди. Арбелоа эса аввало клуб олдидаги масъулиятни тўлиқ бажариш, кейин эса чақирув бўлса терма жамоа учун ҳам шундай фидокорона ўйнаш кераклигини таъкидлади.

«Мен кучини асрайдиган, курашга киришмайдиган, жароҳатдан қўрқиб ўзини тийадиган ёки майдонда бошқа нарсани ўйлаб, максимал даражада ўйнамайдиган футболчиларни тушунмайман. Ҳозир бу «Реал» учун охиригача берилиш дегани. Ишончим комил, бизнинг йигитлар ҳам тўлиқ куч билан ҳаракат қилади», — деди Арбелоа.

Мутахассиснинг фикрича, жаҳон чемпионатига тайёргарликнинг энг тўғри йўли — клуб сафида юқори даража кўрсатиш ва ҳар бир ўйинда ўзингни исботлаш.

Эслатиб ўтамиз, ёздаги жаҳон чемпионатига АҚШ, Канада ва Мексика мезбонлик қилади.