Роналду пенальтини ура олмади, «Ал-Наср» барибир ютди

Саудия Арабистони чемпионатининг шанба кунги учрашувида «Ал-Фейҳа» ўз майдонида «Ал-Наср»ни қабул қилди. Турнир пешқадами бўлиб турган меҳмонлар қийин вазиятларга қарамай, якунда ғалабани қўлдан чиқармади. Бу ҳақда euro-football.ru хабар беради.

Ўйин бошида Криштиану Роналду пенальтидан фойдалана олмади: унинг зарбаси чап устунга тегиб, майдондон чиқиб кетди. Биринчи бўлимга қўшиб берилган дақиқаларда эса «Ал-Наср» ўз дарвозасига гол ўтказиб юборди — ўнг қанотдан узатилган тўпни дарвозабон ушлашга чиқди, бироқ ҳимоячи Абдулела ал-Амри уни ўзи дарвозасининг яқин бурчагига йўналтириб юборди (1:0).

Иккинчи таймда «Ал-Наср» босимни кучайтирди: Жоау Фелишнинг жарима майдонидаги уринишини рақиблар тўсди, қайтган тўпга Роналду 15 метрдан кучли зарба берди, лекин дарвозабон қайтарди. 72-дақиқада Султон ал-Ганамнинг узоқ узатмасидан кейин Кингсли Коман жарима майдонига ёриб кириб, узоқ устунга пас берди ва Садио Мане ҳеч ким халақит бермаган ҳолда ҳисобни тенглаштирди — 1:1.

Кейинги дақиқаларда Марсело Брозович шеригини яккама-якка вазиятга олиб чиқди, аммо Айман Яҳё дарвозабонни алдаб ўта олмади. Шундан сўнг Брозовичнинг яна бир пасидан кейин Коман узоқ бурчакка йўллаган зарбани ҳам дарвозабон сакраб қайтарди. 80-дақиқада бурчак зарбасидан кейин тўп Фелишга келиб тушди: у 20 метрдан яқин устунга теккизди, тўп дарвозабон орқасидан дарвоза чизиғидан ўтиб кетди — 1:2.

Якуний нуқта 85-дақиқада қўйилди: Фелиш билан комбинациядан сўнг Абдуллоҳ ал-Ҳамдан жарима майдонида 8 метрдан аниқ зарба бериб, фарқни катталаштирди — 1:3. Натижада «Ал-Наср» уч очкони сақлаб қолди ва жадвалда икки очколик устунлик билан пешқадамликни давом эттирди, «Ал-Фейҳа» эса 11-ўрин атрофида қолди.