«Галатасарай» ва «Фенербахче» футболчиларини ставкалар иши учун қамоқ кутмоқда

Туркия футболида шов-шувли ҳолат: «Галатасарай» ва «Фенербахче» клублари вакили бўлган икки футболчи тикиш (ставка) билан боғлиқ иш сабабли қамоқ жазосига тортилиши мумкин. Бу ҳақда euro-football.ru хабар беради.

Гап «Галатасарай» ҳимоячиси Метехан Балтаджи ҳамда «Фенербахче» сардори Мерт Ҳакан Яндаш ҳақида бормоқда. Уларнинг биринчисига 13 йилгача, иккинчисига эса 17 йилгача озодликдан маҳрум этиш хавфи таҳдид солмоқда.

Sabah нашри хабарига кўра, Балтаджи камида икки марта «Галатасарай» ўйинларига ставка қўйган. У ўша учрашувларда асосий таркибда майдонга тушмаган бўлса-да, жамоа қайдномасидан жой олган, бу эса назарий жиҳатдан ўйин натижасига таъсир ўтказиш имконини истисно қилмайди.

Амалдаги Туркия қонунчилигига кўра, футболчи букмейкерларга ўзининг профессионал спортчи эканини билдириши шарт эди, бироқ у буни бажармагани таъкидланмоқда.