Грехем Поттер танқид Дьёкерешни кучайтирганини айтди
Швеция терма жамоаси бош мураббийи Грехем Поттер Лондоннинг «Арсенал» клуби ҳужумчиси Виктор Дьёкереш манзилига айтилган танқидлар футболчининг ўзига фойда берганини таъкидлади. Бу ҳақда euro-football.ru хабар беради.
«Тўпчилар» швед форвардини ўтган ёзда Лиссабондаги «Спортинг»дан таркибига қўшиб олганди. Дьёкереш мавсум давомида гол кўрсаткичлари етарлича ёрқин эмаслиги учун кўп бор танқид қилинди, бош мураббий Микел Артета эса айрим ўйинларда унинг ўрнига бошқа ҳужумчиларга ишонч билдирди.
Поттернинг фикрича, босим ва эътирозлар Викторнинг характери қанчалик кучли эканини кўрсатди. Мутахассис Дьёкерешга шубҳа қилмаслигини, уни юқори савиядаги футболчи ва яхши инсон деб билишини айтди. Шунингдек, у ҳужумчи «Арсенал»нинг барча тўртта турнирдаги натижаларга ўз ҳиссасини қўшганини қайд этиб, танқид футболчилик касбининг ажралмас қисми эканини эслатди.
Жорий мавсумда Виктор Дьёкереш «Арсенал» сафида 36 учрашувда майдонга тушиб, 15 гол ва 2 ассист муаллифи бўлди.