«Ювентус» март ойида Влахович билан музокара ўтказади

«Ювентус» ҳужумчиси Душан Влахович клуб билан шартномани узайтириш масаласини муҳокама қилади. Аввалроқ сербиялик футболчи деярли аниқ Туринни тарк этиши айтилганди, бироқ сўнгги ҳафталарда вазият ўзгаргани қайд этилмоқда. Бу ҳақда euro-football.ru хабар беради.

Журналист Николо Скиранинг маълумотига кўра, томонлар учрашувни март ойига белгилаган. «Қари синьора» раҳбарияти 26 ёшли форварднинг агенти билан кейинги ҳамкорлик шартларини келишиб олишга уринади.

Влаховичнинг «Ювентус» билан амалдаги меҳнат шартномаси июн охирида якунланади. Футболчи жамоада қолиши учун маоши сезиларли камайтирилишига рози бўлиши кераклиги тахмин қилинмоқда.

Шунингдек, ҳужумчига «Барселона», «Милан», «Бавария» ва бошқа клублар ҳам қизиқиш билдираётгани ҳақида хабарлар тарқалган.