Анчелотти: мураббийликда ишонч ҳаммасини ҳал қилади

Машҳур мураббий Карло Анчелотти ўз ишининг асосий жиҳатлари ҳақида фикр билдирди. Италиялик мутахассиснинг таъкидлашича, мураббийликдаги энг муҳим омил — жамоа ва раҳбариятнинг ишончи. Бу ҳақда euro-football.ru хабар беради.

“Мураббий билан тузилган шартнома ишонч бор экан яшайди. Мени деярли ҳамма жойда истеъфога чиқаришган. Мен ўнта клубда ишлаганман ва уларнинг еттитасида мени ишдан бўшатишган”, — дея Анчелоттининг сўзларини Cadena SER келтирди.

Маълумки, ўтган ёздан буён Карло Анчелотти Бразилия терма жамоасини бошқармоқда. 2026 йилги жаҳон чемпионати гуруҳ босқичида “селесао” Шотландия, Гаити ва Марокко билан баҳс олиб боради. Бразилия мундиални 2002 йилдан бери илк бор ютишни асосий мақсад қилиб қўйган.