“Реал” Арбелоани ҳам ҳайдайдими? Арбелоа учун ҳал қилувчи кеча...

Мадриднинг “Реал” клубида яна мураббийлар мавзуси қизиб кетди. Бу гап-сўзлар “Осасуна” майдонидаги 1:2 ҳисобидаги мағлубиятдан кейин янада кучайгани айтилмоқда. Яъни, натижа ёмон — сабр тарози эса яна бир бор қимирлаб қўйди.

Энди эътиборнинг барчаси Европа Чемпионлар лигаси плей-оффидаги жавоб учрашувига қаратилди. 25 февраль куни “Бенфика”га қарши баҳс Альваро Арбелоа учун оддий ўйин эмас, балки лавозимдаги келажакни ҳам белгилаб бериши мумкин бўлган тўқнашув сифатида қаралмоқда.

Испания матбуоти, хусусан, Sport.es манбасига кўра, клуб ичидаги кайфият ҳам ўнгайиб кетмаган. Гўёки, футболчилар жамоа ва унинг атрофида кечаётган жараёнларга ишончни йўқота бошлаган. Раҳбарият эса Арбелоа танлаётган тактик йўлни тушуниш қийинлашаётганини яширмаяпти.

Манба таъкидлашича, “қироллик клуби” раҳбарларига мураббийнинг айрим қарорлари “футболчиларга ёқиш” учун қилинаётгандек туюлаяпти. Ўйин давомидаги алмаштиришлар ҳам кўп савол туғдирмоқда: ким чиқди, ким кирди — лекин мантиқ ҳамма вақт ҳам ушланмай қоляпти.

“Реал” эса одатдагидек натижа талаб қилади: бу ерда “мақсад — иштирок” деган гап умуман ишламайди. Шунинг учун “Бенфика”га қарши ўйин омадсиз тугаса, 43 ёшли мутахассис билан шартномани бекор қилиш эҳтимоли ҳам истисно қилинмаяпти.

Бироқ клуб раҳбарияти бундай сценарийдан қочишни хоҳлаши ҳам айтилмоқда. Сабаби оддий: ҳозирча бош мураббийликка “тайёр ва муносиб” аниқ номзод кўринмаяпти. Қолаверса, февраль ойининг ўзи — мавсум ўртасида учинчи мураббийни тайинлаш учун жуда эрта муддат, бу эса клубни янада катта беқарорликка олиб кириши мумкин.

Хулоса шу: 25 февраль — Арбелоа учун “календардаги сана” эмас. Бу кеча "Реал"да ишончни тиклаш кечасими ёки янги бош оғриғи бошланиш нуқтасими — майдон кўрсатади.