Луис Энрике ПСЖ учун «Челси»ни маъқул рақиб деб атади

«Пари Сен-Жермен» бош мураббийи Луис Энрике Европа Чемпионлар лигаси 1/8 финалида жамоаси учун қайси рақиб маъқулроқ эканини айтди. Бу ҳақда euro-football.ru хабар беради.

Париж клуби плей-оффнинг стиков босқичида «Монако»дан ўтиб кетса, кейинги раундда «Барселона» ёки «Челси» билан тўқнаш келади. Дастлабки учрашувда ПСЖ сафарда монаколикларни 3:2 ҳисобида мағлуб этган.

Энрике фикрича, эҳтимолий вариантлар ичида «Челси» ПСЖ учун қулайроқ. У «Барселона»нинг ўйинни ишончли назорат қилиши, юқори прессинг қўллаши ва таркибида бир лаҳзада ўйин тақдирини ҳал қила оладиган футболчилар кўплигини алоҳида таъкидлади.

«Агар танлаш имконим бўлса, «Челси»ни танлардим. «Барселона»га қарши ўйнаганда фақат жамоага эмас, бутун бир ғояга ҳам қарши турасан, бу эса вазифани янада мураккаблаштиради», — дея Энрикенинг сўзларини испан ОАВ келтирди.

Чемпионлар лигаси 1/8 финал баҳслари март ойида бўлиб ўтади.